महावितरण अभियंता पारेख यांचेवर आजाद समाज पार्टी संतप्त
60 दिवसाची मर्यादा असताना, पाच महिने होऊन सौर पंप नाही
गडचिरोली जिल्हा प्रतिनिधी :- आशिष लाकडे.
गडचिरोली | प्रतिनिधी
: आजाद समाज पक्षाने गडचिरोली येथील महावितरण कार्यकारी अभियंता पारेख यांना कार्यालयात घेराव घालत तीव्र आंदोलन केले. शेतकऱ्यांनी ‘मुख्यमंत्री मागेल त्याला सौर पंप’ या योजनेअंतर्गत डिमांड भरूनही तब्बल 150 दिवस झाले तरी सौर पंप मिळालेले नाहीत, ही शेतकऱ्यांची लूट असून महावितरण विभाग झोपेत असल्याची संतप्त तक्रार केली.
वर्क ऑर्डर नुसार शेतकऱ्यांनी डिमांड भरल्या नंतर 60 दिवसात सौर पंप बसवणे बंधनकारक असतानाही महावितरणकडून कोणतीही कार्यवाही झाली नसल्याने शेतकऱ्यांमध्ये प्रचंड नाराजी आहे. शासनाने मोठ्या मोठ्या जाहिरातीतुन सदर योजनेचा प्रचार केला व प्रचंड खर्च केला. पण शेतकऱ्यांना अद्याप याचा लाभ मिळाला नाही.
महावितरण अधिकारी दुर्लक्ष करीत असून कंपनीवर कारवाई करावी व संबंधित कंत्राट रद्द करण्यात यावे, अशी ठाम मागणी आजाद समाज पक्षाकडून करण्यात आली.
विज चोरीच्या नावाखाली सामान्य नागरिकांवर अन्याय?
याचवेळी आजाद समाज पक्षाने आणखी एक गंभीर मुद्दा उपस्थित केला. विज चोरीच्या आरोपाखाली 50 हजार रुपयांहून अधिक दंड सामान्य नागरिकांवर लादण्यात आला असून त्यामध्ये गैरप्रकार झाल्याची शक्यता असल्याने त्याची चौकशी व्हावी, अशी मागणीही यावेळी करण्यात आली.
अधिकाऱ्यांचा निषेध, त्वरित निर्णयाची मागणी
आजाद समाज पक्षाचे जिल्हाप्रभारी विनोद मडावी व जिल्हाध्यक्ष राज बन्सोड म्हणाले, “सरकार योजना जाहीर करते, पण प्रत्यक्षात अंमलबजावणीत मोठ्या त्रुटी आहेत. आमचं संयम संपत चाललं आहे. जर त्वरित कार्यवाही झाली नाही, तर उग्र आंदोलन उभं केलं जाईल.” तसेच ग्राहकांची परवानगीशिवाय नवीन वीज मीटर बसवू नये!”
आजाद समाज पक्षाची ठाम मागणी आहे की, शासनाच्या गाईडलाईन नुसार महावितरण विभागाने ग्राहकांची स्पष्ट लिखित परवानगी घेतल्याशिवाय कोणत्याही ग्राहकाच्या घरी नवीन वीज मीटर बसवू नये. ज्या ठिकाणी मीटर बसवलेत त्यांची परवानगी घेण्यात आली नाही अशी तक्रार नोंद करण्यात आली व विज बिल वाढीव येत असल्याचे निदर्शनास आणून दिले.
अखेर महावितरणचे अधिकारी पारेख यांनी निवेदन स्वीकारले व वरिष्ठांकडे पाठवण्याचे आश्वासन दिले. मात्र आंदोलनकर्त्यांनी स्पष्ट केलं की, केवळ आश्वासन चालणार नाही, कृती हवी!
यावेळी विनोद मडावी, राज बन्सोड यांचेसह महासचिव पुरुषोत्तम रामटेके, प्रकाश बन्सोड, नागसेन खोब्रागडे, धनराज दामले, महिला आघाडी अध्यक्ष सोनाशी लभाने, सविता बांबोळे, युवा अध्यक्ष विवेक खोब्रागडे इत्यादी पदाधिकारी व नागरिक उपस्थित होते.
