गणेश राठोड जिल्हा प्रतिनिधी यवतमाळ
मेट (ता. उमरखेड):
शेतीच्या बांधावर पाऊल टाकत, उन्हातान्हात आई-बाबांसोबत राबत मोठी झालेली आपल्या गावातील सतीका राठोड हिने आज पोलिस वर्दीतील आपली स्वप्नपूर्ती साधली आहे. नागपूर येथील पोलीस प्रशिक्षण केंद्रात नऊ महिने कठोर प्रशिक्षण घेऊन तिने महाराष्ट्र पोलीस दलात यशस्वी प्रवेश केला आणि पदग्रहण सोहळ्यात ती वर्दीत झळकली – हे दृश्य केवळ गौरवाचे नव्हते, तर मातीच्या लेकराने मातेच्या साऱ्या वेदनांना उत्तर दिले होते!
सतीकाचे शिक्षण जिल्हा परिषद प्राथमिक मराठी शाळा, मेट येथे पहिली ते सहावीपर्यंत झाले. त्यानंतर धनकी येथील कन्या शाळेत बारावीपर्यंत शिक्षण घेतले.
शहरात रहात नाही, मोठ्या कॉलेजमध्ये शिकत नाही, तरीसुद्धा तिच्या डोळ्यांत एक स्वप्न होतं – “आई-वडिलांच्या कष्टाला न्याय द्यायचा!”
शेती करताना हातात कुऱ्हाड होती, नांगर होता, पण मनात होती पोलीस वर्दीची जिद्द. सतीकाने अभ्यासाकडे कधीही दुर्लक्ष केलं नाही. दुपारी बैलांची दोरी हातात असली, तरी संध्याकाळी पुस्तकं उघडली जात होती. आणि अखेर – तिच्या अथक मेहनतीचं फळ तिला मिळालं.
आज ती जेव्हा पोलीस वर्दीत उभी होती, तेव्हा तिच्या आई सौ. यमुनाबाई गांधी राठोड आणि वडील गांधी सवाई राठोड यांनी बंजारा पारंपरिक पोशाख परिधान करून सोहळ्यात हजेरी लावली. सतीकाच्या यशाच्या त्या क्षणांनी त्यांच्या डोळ्यांतून अश्रू गाळले – आनंदाचे, अभिमानाचे, आणि संघर्ष संपल्याच्या भावनेने भरलेले. त्यांच्या हृदयातील भावना एकच सांगत होत्या:
“आपली मुलगी आता समाजाची रक्षक झालीय!”
त्या आईने तिच्या पदराने मुलीचा घाम पुसला होता, आणि आज तीच आई तिच्या मुलीच्या यशाने स्वतः वंदनीय झाली.
त्या वडिलांनी शेतीसाठी बैल जोडलं होतं, पण आज त्यांच्या लेकीने वर्दी घालून समाजासाठी संरक्षणाची जबाबदारी घेतलीय!
सतीका, तू केवळ पोलीस नाहीस, तू आई-वडिलांच्या अश्रूंमागचा अभिमान आहेस.
तू केवळ एक पोशाख परिधान केलेली नाहीस, तू एक नव्या युगाची सुरुवात आहेस!
