अहेरी, ५ जुलै २०२५ —
आयटक (AIUTUC) संलग्न सफाई कामगार युनियन, नगरपंचायत अहेरीची महत्वपूर्ण सभा नुकतीच संपन्न झाली. ही सभा कॉ. सचिन मोतकुरवार (भाकपा अहेरी विधानसभा अध्यक्ष) व कॉ. सुरज जककुलवार (युनियन संघटक) यांच्या प्रेरणादायी मार्गदर्शनाखाली पार पडली.
या बैठकीत सरकारच्या कामगारविरोधी धोरणांचा तीव्र निषेध करण्यात आला. शासन निर्णय असूनही अहेरी येथील सफाई कामगारांना किमान वेतन दिले जात नाही, वेळेवर पगार मिळत नाही, अशा परिस्थितीला युनियनने आव्हान देण्याचा निर्धार केला.
सभेत पुढील ठराव एकमताने मंजूर झाले:
- शासन निर्णयानुसार किमान वेतन त्वरित लागू करावे
- प्रत्येक महिन्याचा पगार वेळेवर मिळावा
- कंत्राटी व ठेकेदारी पद्धत रद्द करावी
- ४ कामगारविरोधी श्रमकायदे रद्द करावेत
यावेळी ठरवण्यात आले की, ९ जुलै २०२५ रोजी आयटकच्या नेतृत्वात देशभरात होणाऱ्या आंदोलनात अहेरी युनियनचा जोरदार सहभाग असेल, आणि गडचिरोली जिल्हाधिकारी कार्यालयासमोर निदर्शने करत मागण्यांचा ठोस पाढा सादर केला जाईल.
कॉ. सचिन मोतकुरवार यांनी सांगितले:
“भांडवलशाहीच्या गुलामगिरीत अडकलेल्या व्यवस्थेला धक्का देण्यासाठी कामगारांनी संघटित होणं गरजेचं आहे. संघर्षाशिवाय सन्मान नाही.“
कॉ. सुरज जककुलवार यांनी म्हटले:
“आमचा लढा हा फक्त वेतनासाठी नाही, तर प्रतिष्ठेसाठी आहे. शोषणाला मुळासकट उखडून टाकण्यासाठीच आयटकचा झेंडा उभारलेला आहे.“
सभेचा समारोप “शोषणाच्या विरुद्ध लढा – आयटकचा निर्धार!”, “समान काम, समान वेतन – आमचा हक्क!”, अशा संघर्षमय घोषणांनी झाला.
कामगार एकजुटीच्या बळावरच परिवर्तन शक्य आहे – आयटक झिंदाबाद!
